مش هنساهم

بسم الله الرحمن الرحيم

عذرا على الانقطاع المفاجئ للمقالات والشغل الثقافه العالى

جالى تاج من منه الله صابر عن خمس حجات اتكلم عنهم محدش يعرفهم عنى , و بصراحه زى ماهى بتقول تدبيسه فعلا
لانى بصراحه الله اعلم ان كنت هتكلم كلام مرتب كله لباقه و ثقه زى ماهى اتكلمت كده لانى مش زى ماهى قالت
"انى مش هعمل نفسى اتفاجئت" لانى بكل صراحه اتفاجئت لان هم حاجه من الاتنين يا اما كل البشريه تعرف كل الحجات اللى ممكن تتعرف عنى يا اما ولا حد من البشر يعرف حاجه من الحجات اللى مش ممكن تتعرف عنى فايه بقى التدبيسه الفل دى ؟؟؟ اجيب كلام منين دوقتى بقى ؟؟؟؟

ربنا يستر ياااااااااااااااارب

بلاش اطول فى الكلام الخمس حجات اللى هتكلم عنهم هم خمس اشخاص قابلتهم قضاء وقدرمخترتش انهم يكونو فيها بس اهم وجدو وخلاص منهم اللى مشى وبقى ذكرى فضلت موجوده شئت ام ابيت ومنهم اللى لسه موجودين وربنا يخليهم

اول شخص هو مدير فى شركه ما كانت مقابلتى ليه صدفه بحته بحته وبصراحه بعتبر ان العبره والمعنى مكنوش فى الشخص على اد ما كانو فى الظروف المحيطهلان اليوم اللى قابلته فيه كنت فى دوامه ضغوووووط وفى قمه الزهق من الحياه بشكل عام وكان فى مقابله معاه عشان شغل ورحت واتكلمت معاه وعادى رسمت الابتسامه المصديه بتاعت البؤساء ورايحه لان مش فارقه كتير اعد فى البيت او انى اروح ادور على شغل ولا بتاع

المهم رحت وابتديت الانترفيو وفجأه لقيت طاقه غريبه عجيبه من الاصرار والتفاؤل والامل والنجاح قدامى واحد كانت فى حياته ضغوطات كتيره جدا واهلو كانو مصرين انو يشتغل شغلانه معينه وعلى الرغم من انو وافق انو يدرس فى المجال ده الا انو قدر يدرس فى المجال التانى اللى عايزه وحابه وفضل مصر على كده لحد ما بقى مدير لشركه بتقدم كورسات مهمه جدا ومعروفه وكل ده وهو عنده كام سنه ؟؟ 31 سنه
فقعه بقى ... يمكن بعدها فعلا فهمت ان الحل مش دايما انى اصحح وضع غلط مكنش السبب فيه او انى استنى لحد ما الظروف تتحسن .. بل انى اتعايش مع الحياه وابدأ من مترح ما وقفت مش من البدايه خالص

ثانى شخص واحد قابلته زمااااااان تلت اربع سنين كده والمعنى اللى خلانى اوصله بطريقه غير مباشره .... و الطريقه الغير مباشره دى اقصد بيها لانه مكنش من اللى عارفين طريقهم فى الحياه زى اخينا الاول ولا بتاع ... كان فى فتره من حياته ملتزم جدا لدرجه التشدد وبدام لدرجه التشدد فاكيد المعلومات اللى عنده عن ديننا كلها عقد وتراب وبعد الفتره دى بقى انسان عادى جدا واقل من العادى جدا وفى وقت ما قابلته مكنتش اعرف كتير عن الدين ولا كنت افهم كتير فى الاسلام وكان كل ما يدور نقاش بينى وبينو عن اى حاجه تخص دينا طبعا هو اللى كان بيغلب لانه بيستشهد بايات واحاديث وكده بس كنت دايما مبقتنعش بكلامه لان بديهى ان العدل فى كذا فازاى يؤمر الله بغير كذا مش محتاجه حفظ مصحف ولا دراسه فى الازهر عشان تعرف بديهيات عدل يعنى ... فكنت عشان اثبت لنفسى ان كلامى هو الصح او ان ظنى فى الله صح كنت بعد ما بخلص مناقشه معاه اروح ادور على اجابه لاسالتى وده كان سبب انى اعرف اد ايه ربنا عدل وحق فعلا بطريقه غير مباشره

الشخص التالت هو اعظم انسانه قابلتها على الاطلاق وعارفه كويس جدا انى مش هلاقى احسن منها فى يوم من الايام المعنى اللى وصلى منها هو كل المعانىالكويسه اللى ممكن اى انسان يوصلها فى عمرو كلو هو ازاى تكون .... ازاى تقرر و يمكن اصعب حاجه ازاى تقرر دى خصوصا لما بكون داخل فى القرار ناس تانيه فازاى تقرر من غير ما تاذى الناس التانيه المعنى اللى وصلى منها فى التعامل معاها هو البساطه والرحمه فى التعامل وراحت البال والحنيه والامان و يمكن المعانى دى بعيده شويه عنى فعشان كده كنت بدور عليها

ومعلش حبه اقول مين هى ...... هى أمى

الشخص الرابع هو غالبا كان سبب فى انى احب الدين ده جدا جدا جدا جدا لان فى يوم من الايام كنت قاعده معاه وهو كان بيقرى سوره الرحمن فانا كنت بسمعه وقلتلو ان نفسى اقرى القران جدا بس المشكله انى مبفهمش حاجه فى اى حاجه فراح قعد يشرحلى سوره الرحمن باسلوب اروع من الروعه وقالى ان ربنا بيكلم الناس بالقران وفى ايات كتير ممكن توصل لفلان بمعنى فى حين انها ممكن توصل لعلان بمعنى تانى كله على حسب احتياجه ايه من القران ... وبعدها فعلا لقيت ان القران مش كتاب فى كلام مقدس لا حوار ورحمه ومحبه ولقيته ملجأ وأوى وكفايه كده

اما الشخص الخامس هو راجل كبير الله يرحمو بقى كان طول عمرى مبسمعش منه غير الصمت ومبشوفش فى عنيه غير نوع من الحزن والرضا والزهد نظره غريبه على طول كانت فى عنيه كنت على طول فكراه انو مبيحبش الناس ومبيحبش الدوشه والاختلاط الزايد بالناس , وانو قاسى جدا او انو بعيد جدا عن اى حد يقربله لحد ما فيوم طلب منى حاجه فعملتها فجه يشكرنى رحت رديت عليه رد فى لطف منى قلت خلينى كويسه لقيت الوجه العابث المكشر البعييييييييييد والغريب اتحول فجأه لوجه طفل مبتسم فرحان مرتاح ومطمن ... عرفت وقتها ان القسوه اللى فى عنيه دى كان اصلها من قسوه الناس او بعدهم هم عنه ... عرفت وقتها يعنى ايه الانسان ممكن يكون فى قمه احتياجه لانسان غيره بس عزه نفسه رسمت على وشه نظره الشموخ اللى بتكون الستاره اللى غطى بيها قلبه ,,, الله يرحمه بقى

اما بقى سعيد الحظ فى التدبيسه وبجد بحب اسمع قصصهم وكلامهم ..... بيفدونى بصراحه جدا هم

سالى سيد وعمر فهمى و محمد على

بالشفا