تاااااج تاااااااانى

التااااااااج التانى ...يلا احنا ورانا حاجه ؟؟؟

من ويسبر



شكرا يا ويسبر على التدبيسه دى نردهالك فى الافراااااح

انت مين ؟؟

ياسمين الحسينى
مين اكتر ست اشخاص بتحبهم ؟؟

احيااااااااء ولا اموااااااات

؟؟؟

خلينا احياء احسن

ماما
اخواتى
اسماء ... صحبتى السبب الرئيسى فى انى دخلت سكه الالتزام
سلمى ... اللى عمرى ما هنسى فضلها عليا فى تثبيت على الهدى ونصايحها اللى لحد دلوقتى بفتكرهلها
اصحابى فى الكليه وعلى راسهم سالى ( رؤيه ) و منه الله ( طيف )
ناس متطوعين فى معهد الاورام بحبهم فى الله

انت سعيد؟

تسأل حد تايه فى الشارع ومش عارف يروح انت سعيد ولا لأ ؟؟؟ ... هتعصبه خليه فى اللى هو فيه
هيقولك سعيد تعيس المهم اروح ... عااااااااااايزه اروووووووووح
لو اجتمعت انا وحسني مبارك في غرفة واحدة؟

شكلك فااااااهم يا نصّه

هحاول استجمع كل ما املك من ايمانيات عشان متعصبش ... وهسأله انت راض عن مصر ؟
وهسأله ايه رأيك فى شعب مصر ؟
اكيد الايجابه هتبقى دبلوماسيه ومفيهاش ايجابه ... لان مين انا اللى الريس هيتكلم معاها دى
بس هحاول استنبط واستشف اى كلام انتفع بيه فى دور الشعب فى النهضه
بس

لو معاك مليون ونص جنيه......تعمل بيهم ايه؟

هبتدى بيها مشروع متوسط وانجز 10 سنين من حياتى
بس بينى وبينكوا ومحدش يقول لحد
حبه اتأخر العشر سنين دول عشان اللى بيجى بسرعه بيروح بسرعه
ده غير ان معنديش الخبره اللى تخلينى ابتدى كبيره لازم اكون " الواد بليّه " الاول وبعدين افتح ورشه ... أقصد اعمل مشروعى

يعنى ورااااااانا اية

بتحب مصر؟
اه
جدا
بس مش ترابها ونيلها والحوارات دى
بحب شعبها
وبحب بليل فى مصر بس الاماكن الزحمه
وبحب الدماغ المصريه وهى بتمخمخ وبتطلع اجدع افكار و انجازات فى الشغل
وبحب فى المصريين انهم بيحبوا البساطه سواء كانوا اغنيه ولا فقراء
وانهم متواضعين بالفطره ومبيحبوش اللى يتنطط عليهم
وانهم اذكياء جدا ... ووالله بجد مش تريقه
وان اكتر وقت ممكن اضحك فيه وانا راكبه مواصلات وراميه ودن مع الناس فى الشارع
وان على الرغم من المصرى العادى بيبقى شايل هم الدنيا فوق دماغه تلاقيه بيشيل همك ولو يقدر يساعدك هيساعدك
وان من اكتر شعوب الدنيا مبيعرفوش اقل احساسا بالوحده والاكتئاب هم المصرين ( على فكره دى دراسه امريكيه ) عن المصريين
وحجات كتير فى المصريين صعب تلاقيها فى شعوب تانيه
بتحب البنات؟

لا ...

اكيد طبعا بحب البنات ... يعنى هكرهم ليه
ولو السؤال المفروض يتعكس لان اكيد ده مش استطلاع عن مدى حب الشعب المصرى للبنات
وهيبقى بحب الولاد ؟
يعنى بحب الولاد ازاى ؟؟
يعنى ... لو افترضنا انى رحت اى شغل او كورس او اى مكان ولقيت المكان كله بنات هزعل ولا لأ ؟
لا مش هزعل مش بتفرق المهم لو بنات او ولاد يكونوا لذاذ ومش تبتين
ولو بشتغل بحب اشتغل مع الولاد ولا مع البنات اكتر ؟
مبتفرقش المهم النتيجه

انت مسلم ؟

اه ... ليه ؟؟؟
ليه؟

انا اللى بسأل ليه؟؟
كده
من قديم الازل سألت نفسى انا عايزه ابقى مسلمه ولا لأ ؟
بمعنى انى اتولدت مسلمه ... بس هل لو اخترت هكون مسلمه ولا لا؟
والايجابه كانت لأ
كنت وقتها بشوف ظلم كتير اوى ... فى حجات كانت بالنسبالى بديهيه .. زى اللى يقول عمل المراه حرام ويستشهد بايات من القران وبما انى مكنتش بفهم فى اى حاجه فى الدين كنت بقتنع ان ده كلام ربنا فعلا وان ربنا غضبان على المرأه اللى بتشتغل , وفى نفس الوقت كنت بشوف الدادا بتاعت المدرسه بتجرى على رزق ولادها اللى هيموتوا من الجوع لو مشتغلتش ... وكنت بشوف بنات دماغها حلوه جدا , ازاى واحده يبقى عندها طموح نقولها انسى الشغل وربنا يبقى غضبان عليها لو فكرت تحقق طموحها
وكانت البنت الملتزمه كانت كلها عقد ومبتدحكش وكل حاجه عندها حرام حرام وغلط وفى الغالب بتكون جبانه ومبتعرفش تدافع عن رأيها وبتخاف من الناس وخلاص حتى لو معاها الحق وكانت بتغيظنى ومكنتش بعرف اقول انها غلط عشان هى فى نظر الكل من الناس الكويسين اللى بيتكلموا بالدين
وناس كتير كانوا بيحرموا حجات على البنات وبيحللوها للولاد والاتنين عند ربنا غلط , وان الزوج من حقه انه يضرب الزوجه ومش من حقها انها تعلى صوتها عليه
وكنت برده فكره ان ده من ديننا
وحجات ثابته علميا مفيهاش نقاش ... يقولولك ان ربنا عايز كده وديننا بيؤمر بكده ... يعنى معنى كده ان دينا بيدعو للتخلف وضد الحريه وضد الحق وضد العدل ؟؟؟
وكان وقتها الناس اللى حوليا الكويسين والمثقفين مكنش ليهم علاقه بالدين اصلا ... فمكنش فيه سبيل انى اعرف ان ده مش دين الاسلام ده دين العادات والتقاليد
وفضلت مقتنعه ان يا اما اكون فى حاجه مش فهماها ... يا اما فعلا الدين ده فيه ظلم وضد الحريه
لحد ما ابتديت ادور على الصح ... وكنت فى كل مره امشى فيها للاخر مع اللى بيقول عمل المراه حرام ولا حريه البنت حرام ولا المساواه فى الحلال والحرام امر مشكوك فيه
كنت بلاقى ايات واحاديث واقاويل فى ديننا اكنها بتقولى اثبتى على الحق وان ديننا برئ من بدع الناس اختلقتها و ان العادات والتقاليد اللى الناس وخداها منهج وماشيه عليه حاجه والحق اللى القران نزل بيه حاجه تانيه خاااااااالص
وان روح ديننا فى احقاق الحقوق ورفع لشأن الانسان بحريه سويه .... فازاى يكون بينادى بتخاريف فى نفس الوقت
ده غير انى اتحطيت فى مواقف ظلم كتيره ملقتش حد يدافع عنى فيها غير دينى
واتحطيت فى مواقف قسوه محستش برحمه غير لما كنت بفكر فى الله
وملقتش حد بيدافع عن الحق ولا بينادى بالعدل زى دينى
و عمرى ماحسيت انى حره غير لما اتحجبت والتزمت بالحجاب قلبا وقالبا
وعمرى ما خفت وافتكرت الله وصليت وسجدت الا وبعدها اطمنت
فالحمد لله
انا مسلمه ومفتخره باسلامى وعقيدتى
مين اكتر شخصية ما تقدرش تستغنى عنها في حياتك؟ وليه؟

معرفش
ومعرفش ليه معرفش
مش قصدى بكده طبعا ان مبحبش الناس اللى بحبهم
بس الناس اللى فى حياتى سبب فى سعادتى مش سبب فى حياتى
فبيهم من غيرهم الحياه بتستمر
سعيده تعيسه الحياه برده هتستمر
ايه اكتر موقف محرج اتعرضت ليه في حياتك؟واتصرفت ازاي؟

موقف محرج واحد بس ؟؟؟؟

يوووووه

اقول ايه ولا اييييييييييه

ده الواحد من كتر المواقف المحرجه بقى مبقاش بيتحرج

مره كنت راكبه العربيه مع بابا وما ادراكوا ما شكل عربيتنا وبتعمل ايه لما بتتعصب

المهم فكنا فى اشاره ولسه ببص قدامى لقيت عربيه تانيه فيها جارى واصحابه فالطبيعى ان الولد هيسلم على بابا .... وهو بيسلم وبيشاور الاشاره فتحت وفى نفس الوقت العربيه اتضايقت ومش عارفه حاجه اتكسرت فيها واعدت تتنطط فى مكانها

ولا اكننا راكبين ناقه ... وكان منظرنا بااااااااااايخ والناس قعدت تتفرج علينا وكانت فضاااااااااااايح

ومره تانيه كنت راكبه نفس العربيه ورايحه درس الفيزياء ... والظاهر ان فيه ترابط وجدانى بيننى وبينها وحست انى مش عايزه اروح الدرس

المهم كان الدرس كله ولاد وواقفين فى الشارع مستنين كلنا نطلع سوا ولسه جيه افتح الباب عشان انزل زى خلق الله ... والباب مش راضى يتفتح والناس اتلمت واللى يقول اطلعى من الشباك " وانا اقول شباك مين يا عم " وكانت هييييييييييييصه

ومره تالته العربيه فى وسط الشارع والدنيا زحمه ولعت واحنا راكبين فيها ودخان ملا العربيه من جوه وطلعنا نجرى ومنظرنا كاااان شواااااااارع والناس اتلمت وحوارات
كفايه كده عشان حسه ان دمى تقيل اوى ... وده اخر موقف محرج بيحصل دوقتى
ايه الأمنية اللي بتدعي ربنا دايما انه يحققها لك؟

العربيه تتحرق

: D

والله هو لو على الامنيات فهى كتيره

اهمها

ابتدى المشوار

انجح فى المشوار

مظلمش حد معايا خلال المشوار

اكون عند ربنا من الجدعان اللى قد المسؤليه

ضميرى يرتاح ولو للحظه

اعرف ربنا راضى عنى ولا لا

ارضى عن نفسى ولو للحظه

ادخل الجنه مع المصلحين واقابل سيدنا محمد ( ص ) و ابا بكر وعمر بن الخطاب و عثمان بن عفان ( قدوتى فى حياتى العمليه ) وعلى بن ابى طالب وصلاح الدين ومحمد الفاتح والسيده خديجه( قدوتى فى حياتى الشخصيه و العمليه )

وصحبتى اللى اتعاهدت انا وهى اننا نعين بعض على الجنه ( سلمى ) ... بس الحياه بقى ومشاغلها

وكل الناس اللى اتعلمت منهم ولو حرف واحد فى حياتى

وكل الناس اللى احسبهم على خير

وطبعا امى واخواتى رعب ازلى عندى اننا منكنش فى الجنه مع بعض ... او حد فينا يكون بعيد وتايه يوم القيامه ... مش بعرف اصلا ادعى ربنا غير اننا نكون كلنا فى ظله يوم العرض

تمرر التاج دة لمين؟
مش فاكره مين وصلوا التاج ده قبل كده ... بس مش مشكله
رؤية
طيف
روحى فيها
ايام من حياتى
عصفور المدينه
عيون
فن الحياة
خيال الظل واخيرا المدونه المعجزه .... بسمه
يلا ... واللى بيخاااف يطلع بره