الدين الميزان ام الموزون


ادى التاجات ولا بلاش .... ابداع من ابداعات منه الله طيف

في حوار بين اثنين من المفكرين العرب .. نقد احدهما الاخر قائلا .. " انه يحاورني بعقلية خطيب جمعة "جملة تحمل في طياتها نقدا .. او قُل تقليلا من فكر هؤلاء الخطباء .. فما رايك فيما يقدمه الخطباء لنا من فكر - ان جاز تسميته كذلك

هم مين الخطباء دول اصلا ؟؟ قصدك ازهريين ولا سلفيين ولا اخوان ولا دعاه ولا وهابيين ولا مين بالظبط ... ده حتى فى المترو بقى فيه طائفه جديده من الخطباء بتوع دعاء ركوب الدابه وتذكره بسيطه بالنقاب والحجاب وعذاب القبر بعد الدعاء .... بيدوا نفسهم الحق فى الافتاء وهم اخرهم كل معلوماتهم من الكتيبات اللى هتجيب اجلنا قريب ان شاء الله

قوليلى مين هم الخطباء اقولك رأيى على طول

قال
الشافعي " رأيي صواب يحتمل الخطأ ورأي غيري خطأ يحتمل الصواب" فهل تنطبق هذه القاعدة على الدين .. هل ترى ان الدين الذي تؤمن به هو الدين الحق و ربما يكون الاخرون على حق ايضا فيما يؤمنون به من اديان .. ام ان دينك الحق و سواه باطل ؟

يَا أَيُّهَا الَّذِينَ آمَنُوا إِن جَاءكُمْ فَاسِقٌ بِنَبَأٍ فَتَبَيَّنُوا أَن تُصِيبُوا قَوْماً بِجَهَالَةٍ فَتُصْبِحُوا عَلَى مَا فَعَلْتُمْ نَادِمِينَ [الحجرات : 6]
.... انتى قلتى بنفسك قال الشافعى يعنى الشافعى مش تامر ولا سحر ولا بتنجان ... ورأيى ان من يسعى للحق فعلا بكل معنى للكلمه مبيهداش الا لما بيتأكد ان اللى مؤمن بيه ده حق وحتى لما بيتأكد لو اتفتح قدامه باب ان ممكن يكون فيه وجهت نظر تانيه هيدخل الباب ده لسعيه الدائم وراء الحق

بالنسبه ايمانى بان دينى الحق وسواه باطل .... اعلم ان دينى حق لانه الحاجه الوحيده المنطقيه فى حياتنا من الاخر .... لان فيه كثير وكثير وكثير من القوانين التى تدعوا الى استقامه الحياه والعدل والمساواه والرحمه والسلام والقوه والحريه والشموخ والعظمه لكل البشريه فى آن واحد .... وده فى حد ذاته معجزه

لانه بيحكى بمنطقيه مقبوله لكل العقول البشريه حقائق الدنيا والاخره ... لانه فيه ايجابه واضحه لغموض ما بعد الموت والبعث حتى لغموض الحياه والشر والمرض والظلم .... لانه الدين الوحيد اللى عرفنا من خلاله الله ب99 صفه له لانه الدين الوحيد اللى بنحس بوجود الله معانا فى كل لحظه من غير ما نعمل يوجا او نروح نتعبد فى الصحراء .... لانه الدين الوحيد اللى فروضه وسننه بتمشى مع كل عصر وكل وقت وكل مكان

هل هناك دين احق من ذلك الدين ؟؟؟ لو فيه دين احق من ديننا ببساطه كنت هتبعه

مش بقول بايجابتى ان اه بعتبر ان دينى حق وما سواه باطل .... بقول انه لو هناك ما احق منه لاتبعته

وفى الاخير الله اعلم ربنا هو اللى بيحاسب الناس وربنا هو اللى بيغفر كل الذنوب ما عدا الشرك بالله فمين يعرف ممكن يكون فينا واحد موحد بالله من غير ما يتبع الدين الاسلامى وعنده ذنوب الدنيا والاخره وربنا يرى انه يستحق الجنه فيدخله الجنه ... مين يعرف ؟؟

الكثيرون
اليوم .. سواء من العرب او الغرب.. يتجهون الى نقد التدين .. يصفقون الى الاعمال الادبية التي تتصادم مع الدين و يصفونها بالابداعية .. خصوصا .. مع تزايد اعمال العنف في شتى بقاع لارض و التي ترتكب باسم الدين .. و في المقابل يهاجم علماء الدين هذه الافكار.. بدعوى ان الاديان ما وجدت لخنق الحريات .. بل يتجاوزون ذلك للقول بان الدين هو مصدر الحرية .. لكنها تبقى كلمات .. هل التقيت بنفسك بشخص متدين و حر في افكاره .. هل حاولت ان تكون ذلك الشخص .. لكي تبطل تلك النظرية

قبل كده كنت قاعده مع اصحابى بنتكلم على الخطوبه والحدود اللى المفروض تكون موجوده بين المخطوبين ايه وليه .... وكل واحده كانت بتقول رأيها وكلهم رأيهم اتجمع فى وجهت نظر واحده غالبا ... منهم اللى قال ان الراجل هيفقد الثقه فيها لو هى سمحت ليه بتعدى حدوده , وانه هيفتكر انها انسانه وحشه , وانه ممكن يتكلم عليها بطريقه وحشه لو الخطوبه متمتش , وان تعدى الحدود ده ممكن يكون سبب فى مشاكل كتير بعد الزواج من شك وغيره زايده وعدم ثقه .

كل الكلام ده حلو جدا لانه واقعى ومنطقى جدا .... بس ملحظتوش حاجه ؟؟؟ ان ولا واحده قالت عشان الحلال بين والحرام بين .. وانها بتخاف من ربنا .... وانها بتحاول تراعى ربنا .... وان الحدود دى اصلا ربنا اللى حاططها عشان يمنع بلاوى كتير ... يعنى الاحق اننا نخشاه لان الحدود بين المخطوبين مش عشان منظرها يبقى ايه والانسان ملوش دخل بيها ومش هو اصلا اللى حاططها عشان يتراعى ويتخاف منه ونتقيه

اللى عايزه اقوله اننا لما بنتكلم عن الحريه وان ديننا ضد الحريه بنتكلم عن العادات والتقاليد مش قوانين ديننا

احنا اللى بنخنق نفسنا بخوفنا من الناس وتقانا للناس وبعدنا عن الله ... بنخاف ندافع عن الحق ونتكلم بحريه عن ارائنا لاننا بنخاف ان فلان وفلانه يفهمنا غلط .... وده ملوش علاقه بديننا

بنخاف نقول حاجه عكس الطبيعى لان الناس دايما بتبصلنا بصه لوم .... ومن كتر خوفنا من الناس ومن كتر مااحنا بنراعيهم زياده عن اللزوم مبقناش نعمل حساب ان ربنا ممكن يكون ناظرلنا بلوم فى حين ان الناس بصلنا باعجاب ومحبه

كلمه حريه بقت تترجم فى اذهان الناس بانها حريه ماديه .... فى السعوديه دلوقتى المرأه الحره العامله غالبا مبتبقاش محجبه لانها شايفه ان الحريه حريه ماديه

ديننا لما بيدعو للحريه بيدعو للحريه الفكريه , العقليه , المعنويه ومبنوصلش للحريه دى الا باتباع قوانين ساميه اكبر واعلى بكتير من قوانين بيحطها البشر وبمنظور ورؤيه اكبر واعلى بكتير من منظور ورؤيه البشر ,,, وبتقنين الحريه الماديه بشكل عام مش منعها ولا تحريمها بل تقنينها

احنا لما بنحكم على الزانى والزانيه انهم اخلاقهم وحشه بنحكم عليهم بمنطلق انهم صايعين وضايعين وانهم ملهمش امان وحوارات كتير ... فى حين ان ربنا لما قال ان الزنى حرام قال كده عشان الزنى فى حد ذاته باب لذنب اكبر وهو قتل نفس بغير حق ... قال كده عشان يتقفل باب من ابواب الخيانه الزوجيه ولخبطه الانساب والسرقه والغش ... وتحريم الزنى فى حد ذاته تقويم للنفس البشريه او تقنين لشهوات الانسان .... وده فى حد زاته حريه.

شتان ما بين رؤيه الله لتقويم الحياه ورؤيتنا لتقويم الحياه .... الفجوه ما بين الرؤيتين هى اللى خلت الناس تتهم ديننا بكبت الحريات وهى اللى خلت كل متحرر متحرر من قوانين ديننا فى حين هو متحرر من قوانين الانسان ....

طول ما احنا مش مدركين الفرق بين قوانين الله لتقويم الدنيا وقوانين الانسان لتقويم الدنيا هنفضل معتقدين ان التحرر هو كسر القوانين مش اتباعها وهيفضل منظور الغرب لينا اننا مخنوقين فى عنق الزجاجه بسبب اننا معندناش حريه فكريه ولا مفهوم واضح للحلال حلال ليه والحرام حرام ليه ومعندناش حتى الجرأه اننا نسأل او ندخل فى مناقشات توضح وترسخ فى عقولنا اهميه وجود حلال وحرام

احنا اتربينا على الخجل واعتقدنا ان الخجل حياء وببساطه الخجل ضعف وانهزاميه والحياء قوه وعزه نفس وعند الغرب مش متربين على الخجل بس برده مش متربين على الحياء

احنا متربين على الخوف الاجتماعى اننا نخاف نتكلم لا نطلع غلط وهم متربين على انهم يتكلموا ويوصولوا بكلامهم ده لوجهت نظر قد تكون هى الافضل انهم يوصلوا لراى اقوى " شوف الفرق بين كلام اى واحد عربى شوفه بيتهته وبيتلغبط فى الكلام كام مره عشان يقول جمله مفيده و و شوف الغربى العادى لما بيتكلم ولا اكنه كان محضر الكلام اللى بيقوله ده من قبل كده "

احنا معندناش شجاعه ادبيه وهم عندهم شجاعه ادبيه

احنا بنقول اننا بنتبع ديننا فى كل حاجه فى حياتنا .... طيب وهم جابوا وجهت نظرهم دى من عندهم ؟؟؟ ماهم بيقولوا ان احنا ضايعين وواقعين بسبب اننا بنتبع ديننا فى كل حاجه فى حياتنا

الواقع اننا مش احرار لاننا بنتبع قوانين بتكدب علينا وبتقولنا انها ديننا وديننا برئ من كل التفاهات دى

لم التقى بشخص متدين وحر حريه بلا خوف ولا ملامه لنفسه على حريته ,, لم التقى بذلك الشخص بصفه شخصيه ,,,, بس بسمع عنهم او بشوفهم فى التليفزيون

وبحاول اكون حره بكل معنى للكلمه وبسعى لكده فعلا بس مش عشان اغير وجهت النظر دى فحسب ... بس عشان مقدرش اعبد الله والانسان فى آن واحد ومقدرش اخاف الله والانسان فى آن واحد

فى النهايه بعتذر على الايطاله فى الكلام والنرفزه الواضحه فيه .... وبوجه التاج ده لكل اخ واخت ضايفه اللينك لمدونتهم عندى اسما اسما

ويهمنى جدا انى اعرف رأيهم وايجابتهم للمواضيع المهمه اللى بادرت منه الله بالمناقشه فيها

السلام عليكم جميعا

11 comments:

عصفور المدينة said...

بارك الله فيك انا طبعا مش حاعلق على المحتوى لأني جاوبت على التاج
بس مش عارف ليه حسيت إنك منفعلة وانتي بتجاوبي
دمت بكل خير

ولكن لي ملاحظة على قولك أن يدخل إنسان الجنة وهو لم يتبع الدين الإسلامي لأن الشرط لدخول الجنة بعد بعثة النبي صلى الله عليه وسلم هو
لا إله إلا الله
محمد رسول الله

والمناقشة المستفيضة لهذا الأمر عندي في مدونتي

ولكن أذكر حديثا واحدا

عَنْ أَبِى هُرَيْرَةَ عَنْ رَسُولِ اللَّهِ -صلى الله عليه وسلم- أَنَّهُ قَالَ « وَالَّذِى نَفْسُ مُحَمَّدٍ بِيَدِهِ لاَ يَسْمَعُ بِى أَحَدٌ مِنْ هَذِهِ الأُمَّةِ يَهُودِىٌّ وَلاَ نَصْرَانِىٌّ ثُمَّ يَمُوتُ وَلَمْ يُؤْمِنْ بِالَّذِى أُرْسِلْتُ بِهِ إِلاَّ كَانَ مِنْ أَصْحَابِ النَّارِ ».

رواه مسلم باب وجوب الإيمان برسالة
نبينا
ورواه أيضا الطبراني وأبوداود وأحمد وغيرهم عن أبي موسى
بلفظ

لا يسمع بي أحد من هذه الأمة ولا يهودي ولا نصراني فلا يؤمن بي إلا كان من أهل النار


وأنت تعلمين يا أختاه أن هذه أمور غيبية لا يتوصل إليها بالعقل وإنما بالوحي

حراس الحقيقة said...

عصفور المدينه
اسعدنى كثيرا ان يكون تعليقك اول تعليق
وممكن اكون كنت منفعله فعلا عشان المواضيع اللى منه الله طيف اتكلمت فيها غالبا بتنرفز على الاقل بتنرفزنى :D
بالنسبه للانسان اللى ممكن يدخل الجنه وهو غير مسلم ... فالجواب الصحيح فيها ان الله اعلم ولم اقصد فى كلامى ان اقول سيدخل الجنه او سيدخل النار لان الله اعلم باحوال الناس وهو اللى بيحكم فى المسائل دى مش اى انسان
بس رأيى يعنى والله اعلم صح ولا غلط ان ممكن يكون فيه مسيحى مؤمن برسول الله انه رسول الله ... ومؤمن بالقرآن انه كتاب الله , ومؤمن بالجنه والنار والله وان عيسى ايضا رسول الله والملائكه والبعث والقيامه ولكنه مسيحى ... وعلى فكره فى طوائف مسيحيه ايمانها كده فعلا
الناس دول امنوا ان لا الاه الا الله وان محمد رسول الله
بس متبعوش سنه رسول الله
هل دول ينطبق عليهم الحديث اللى حضرتك ذكرته ؟؟
لو هجاوب على السؤال ده هتكون ايجابتى قولا وفعلا " الله اعلم " مينفعش اقول رأى فعلا دى حاجه فى علم الغيب
يهمنى اعرف رأيك جدا
والسلام عليكم ورحمه الله

The Manager said...

بسم الله الرحمن الرحيم

علشان مش اتلخبط
الموضوع ثلاثة اجزاء
تعليقي
-------
1-
انا متفق معاكي ف الجزء دة طبعا وبرضه احترت لما قرأت سؤال الأخت روعة ومش عارف أنهي خطباء بالضبط !!

2-
هو كلامك سليم وكل مسلم هيكون شايف ان دينه هو الصواب لأسباب هو شايفها ,لفتت نظره او قابلها فى حياته وكلها صحيحة إن شاء الله , ربما تلاقى عندي اسباب مختلفة ولكنه اختلاف تنوع مش اختلاف تضاد والحمد لله
برضه هختلف معاكي زي الأستاذ عصفور المدينة
بس هعلق على تعليقك عليه لو سمحتى :

هو كلامك غريب شوية
أزاي مؤمن ان سيدنا محمد صاى الله عليه وسلم نبي ومش بسمع كلامه !! ومسيحي !! يعنى عارف ان الطريق هو دة ومفيش غيره طريق للجنة ومتبعوش !!
دة اصلا انتى قلتيها مش مسلم !!
وهيموت على غير دين الإسلام والملائكة تسأله من رسولك هيقول إيه !!

دة دين جديد ولا إيه !!
بيعبد ربنا على مزاجه يعنى !!
انا مش مقتنع خالص بصراحة

والفكرة عموما هو احنا -انا عن نفسي يعنى - لازم نراعي اعتقاد غير المسلمين بأن دينهم هو الصح برضه ونعاملهم على هذا الأساس ... لكن مش طبعا بمقولة الإمام الشافعي لأن مينفعش تطبق فى الحالة دي لكن بنتعامل بيها ظاهرين فى احترام دينهم وكدة يعنى

3-
لو هرد هكتب كل إللي بييجي فى بالي وانا بقرأ الجزء دة هكتب كتير جدا
هو السبب في الوضع اللى احنا فيه كمسلمين ان للأسف حتى المعتقدين انهم متدينين والناس فرحانه بيهم فاهمين الدين بصورة مش هي الصح للأسف سواء فى اى ناحية من نواحي الحياة ... محتاجين نعرف الإسلام الصحيح إللى هو العلاقة بينا وبين الأخر قبل ما يكون مجرد عبادات وحركات نؤديها ولا نعيها ولا تؤثر فى طبائعنا
لازم نعرف ان الدين المعاملة

والحرية معناها اللي بقى واسع قوي خلاني مش عارف اتكلم عنها فى تعليق للأسف

اسف للإطالة واللخبطة
وجزاكي الله عني خيرا :))

حسن ارابيسك said...

أشعر بالتغير الجميل الذي أصابك
وأنك على أبواب فلسفة جديدة بالنسبة لكي

طال الليل said...

قال تعالى
ومن يبتغ غير الإسلام دينا فلن يقبل منه وهو فى الأخرة من الخاسرين
صدق الله العظيم

الموضوع كبير وكنت قد أجبت عن التاج من وجهة نظرى الشخصيةفى تدوينات بعنوان
قول على قول

فى الخلاف

الدين والحريات

أدعو حضرتك لإبداء الرأى فيما كتبت

طبعا الفهم الصحيح للدين وقواعده الكلية ومقاصد الشريعة سيؤثر إيجابا على فهم كثير من معضلات الأحوال المعقدة فهما يبنى ويرفع البناء لنهضة الأمة
شكرا لحضرتك وبارك الله فيك

عمرو المصري said...

the warrior is back to his land

and begin his war again

حسن ارابيسك said...

فينك
بعد هذا الجدل من خلال هذا الجدل
ورغم انه كان اول تاج اقرأه لاني لاأحب التاجات الا انه كان قيم بحواركما الجاد
ولكن هل خرجتي بشئ فاوقفكي عن التدوين
ايه الحكاية
ياترى هاتقولي حاجه
احنا مستنيين

حسن ارابيسك said...

احببت أن أكون أول واحد في البلوجرية يقولك كل سنة وانتي طيبة بمناسبة العيد الأضحى المبارك
حسن

The Manager said...

انتى فين يا ستى ؟

امتحانات برضه ؟ ولا إيه ؟؟

مش باينة خالص خالص

غطسانة كدة :D

إن شاء الله تتحفينا ببوست جديد قريبا يا ياسمين

وربنا يوفقك

المجاهدة said...

طريقة تفكيرك في اغلب النقاط عاجباني
:)

ربنا يبارك في فكرك و عقلك و يحفظك يا جميل :)

اللهو الخفى said...

السلام عليكم بجد وحشني ريحة الحقيقة
اخيرا لقتها و لسه شابه زي ما هي بس احنا شبنا
المهم الموضوع ده كنت هتكلم فيه بس كده لقيت حد متكلم فيه و انتي مطولتيش لان الموضوع ده ما ينتهيش غير سا الحال يتصلح و ده علي جثة ابليس مش هيحصل
او نموت المهم هي المشكله ان محدش يغرف حاجه عن الدين في عصرنا ده غير قله
و الغريب ان كل من صلى بناس بقى امام و كل اللي حفظ ايتين في القران بقي شيخ علان و بقى الدين تجارة و ربح
اللي هقول و بحاول الخصه ان ربنا حط الدين للبشر قانون يحميه من الخراب و الفساد و الدمار و مادام ما الانسان شايف انه غلط و دخل الدين تبع موضة الحرية اللي بيسلبها لنفسه ببعده عن الدين(بقى يسمح لنفسه يمسح الجزم و يتشتم عشان يوصل لمركز بقى لعبه في ايد الناس و عبد للشيطان و هواه)انا عارف اني حملت عليهم بس ده لان ديه غفله الدين كرم الناس و حط لهم قوانين تحميهم من شرور و مصايد ابليس بس بعدنا عنه و نسينا رحمته عشان حضن او قبله او صوره هتزول و مش بتعد كتير اخرها ثواني و نسيت رحمت ربنا اللي بدوم و مش بتموت و لا بتزول الا لو بعدنا عن قانون ربنا ربنا يهدينا و يصلحنا و يارب اصلحني انا و امة نبينا محمد يا رب دعاكي لينا ربنا يقوينا علي نفسنا عشان احنا اتغلغلنا في وسط الخطر
ربنا يباركلك و يحميك و يحمي كل من في قلبه ذرة ايمن و يزيدها ربنا بقدرته و يا رب يعفيكي و يهديكي و يغفرلك و يحميكي و اخوانا في الدين امين
اسف جدا للاطاله

There was an error in this gadget